ކަން

ދިވެހިބަހުގެ ޤަވާޢިދުގައި "ކަން"

#	ފޮތުގެ ނަން	ތަފްސީލް
1	ދިވެހިބަހުގެ ބަސްމަގު	އިތުރު އެހެން ބަހެއް ގުޅުމަކާއި ނުލައި ތިންޒަމާނުންކުރެ އެއްޒަމާން އެއިން ދޭހަވާ ކޮންމެ ބަހެއް. މިސާލު: ދިޔަ، ދަނީ، ދާނެ.
2	ތުހުފަތުލްޢަދަބިއްޔާ	ވެއަތުވެދިޔަ ޒަމާނާއި، މިހާރު ހިނގަހިނގާއޮތް ޒަމާނާއި އަދި އަންނާންއޮތް ޒަމާން މި ތިން ޒަމާނުންކުރެ ޒަމާނަކާއި އެކުލެވިގެން މައުނައެއް ދޭހަވާ ލަފުޒު.
3	ސުއްލަމުލް ޢަރީބް	ބުނާބުނުމުން ކަމެއްކުރުމަށް ދޭހަކުރާ ކޮންމެ ބަހެއް. މިސާލު: ބުނި، ބުނެފި، ބުނޭ، ބުނާނެ.
4	ދަރިވަރުންގެ އެހީތެރިޔާ	ކުރާ، ކުރެވިއްޖެ ނުވަތަ ކުރާންވެފައިވާ ކޮންމެވެސް ކަމެއްދޭހަކޮށްދޭ ބަސް. މިސާލު: ހިގައިފި، ދަނީ، ކާނެ
5	ފިޔަވަޅު 1، 2، 3،	ކުރިއަށް ވޭތުވެދިޔަ ޒަމާނުގައި ނުވަތަ މިހާރު ހިނގަހިނގާއޮތް ޒަމާނުގައި ނުވަތަ ފަހުން އަންނަންއޮތް ޒަމާނުގައި ކަމެއް ހިނގުމުގެ މާނަދޭހަކޮށްދޭ ބަސްބަހީ ކަމެވެ.
6	ދިވެހިބަހުގެ ޤަވާއިދު 1، 2، 3، 4	ވޭތުވެދިޔަ ޒަމާނުގައި ހިނގާފައިވާ ކަމެއް، ނުވަތަ މިހާރު ހިނގާކަމެއް، ނުވަތަ އަންނާންއޮތް ޒަމާނުގައި ހިނގާނެ ނުވަތަ ހިނގާފާނެ ކަމެއް ދޭހަކޮށްދޭ ކޮންމެ ބަހެއް.

 

ދިވެހިބަހުގެ ގަވާއިދުގައި "މަސްދަރު"

#	ފޮތުގެ ނަން	ތަފްސީލް
1	ދިވެހިބަހުގެ ބަސްމަގު	ކަމުގެ ނަން.
2	ދަރިވަރުންގެ އެހީތެރިޔާ	ކަން އުފެދުމުގެ އަސްލު މިސާލު: ވަނުން، ބެލުން، ނެށުން.
3	ފިޔަވަޅު 1، 2، 3،	ކަން އުފެދުމުގެ އަސްލު ނުވަތަ ކަމަކަށްކިޔާ ނަން މިސާލު: ލިޔުން، ކިޔުން، ދުވުން.
4	ދިވެހިބަހުގެ ޤަވާއިދު 1، 2، 3، 4	ކަން އުފެދުމުގެ އަސްލު މިސާލު: އައުން، ކިޔުން، ނެށުން.

 

ދިވެހިބަހުގެ ޤަވާޢިދުގައި "ޒަމާން"

#	ފޮތުގެ ނަން	ތަފްސީލް
1	ދިވެހިބަހުގެ ބަސްމަގު	ކަންހިނގި ޒަމާނަކީ، ކަމެއް ހިނގާ އިރު އެކަން ހިނގިޒަމާން އަންގައިދޭ ކޮންމެ ބަހެއް. މިސާލު: އިއްޔެ، އެހިނދު، އަބަދަށްޓަކައި.
2	ދަރިވަރުންގެ އެހީތެރިޔާ	ކަމެއް ހިނގި، ހިނގާ، ނުވަތަ ހިނގާނޭ ވަގުތު ދޭހަކޮށް ދިނުމަށްޓަކައި ކަމަކަށް ގެނެވޭ ބަދަލު.
3	ފިޔަވަޅު 1، 2، 3،	ޒަމާން ދޭހަކޮށްދެނީ، ކަންހިނގުމުގެ ވަގުތެވެ. އެކަންދޭހަކޮށްދިނުމަށްޓަކައި މަސްދަރަށް ގެނެވޭ ބަދަލެވެ. މިސާލު: ލިޔުން، ލިޔެފި، ލިޔާނެ، ލިޔުނު، ލިޔުނީސް.
4	ދިވެހިބަހުގެ ޤަވާއިދު 1، 2، 3،4	ކަމެއް ހިނގި، ހިނގާ، ނުވަތަ ހިނގާނޭ ވަގުތު އަންގައިދިނުމުގެ  ގޮތުން ކަމަކަށް ގެނެވޭ ބަދަލު.

 

ޒަމާނުގެ ބައިތައް

ހ) ވާކަން

#	ފޮތުގެ ނަން	ތަފްސީލް
1	ދިވެހިބަހުގެ ބަސްމަގު	ވެދިޔަ ޒަމާނެއްގައި ކަމެއް ހިނގަހިނގާ ހުރިކަން އަންގައިދޭ ކޮންމެ ކަމެއް. މިސާލު: ކައޭ، ކުޅޭއޭ.
2	ދަރިވަރުންގެ އެހީތެރިޔާ	ވާހަކަދެކެވޭ ޒަމާނުގައި ނުވަތަ އިސްވެދިޔަ ޒަމާނެއްގައި ކޮންމެވެސް ކަމެއް ހިނގާކަން. މިސާލު: އޭނާ އޭރުވެސް މިގެޔަށް ވަދެއެވެ.
3	ފިޔަވަޅު 1، 2، 3،	އެއީ އިހަށްވެސް، މިހާރުވެސް، އަދި ފަހުންވެސް ވާކަންތައްތަކެވެ. މިސާލީ: ކޮންމެ ދުވަހަކު ހެނދުނު އިރުއަރައެވެ.
4	ދިވެހިބަހުގެ ޤަވާއިދު 1، 2، 3،4	އިހަށްވެސް މިހާރުވެސް ވާކަންތައް. މިސާލު: އޭނާ އޭރުވެސް މަހަށްދެއެވެ.

 

ށ) ވޭވޭހުރިކަން

#	ފޮތުގެ ނަން	ތަފްސީލް
1	ދިވެހިބަހުގެ ބަސްމަގު	ކަމެއް މިހާރު ހިނގަމުން ދާކަން އަންގައިދޭ ކޮންމެ ކަމެއް. މިސާލު: ލިޔަނީ.
2	ސުއްލަމުލް ޢަރީބް	މިސާލު: ބުނަނީ، އަހަނީ.
3	ދަރިވަރުންގެ އެހީތެރިޔާ	ކޮންމެވެސް ކަމެއް ވާހަކަދެކެވޭ ވަގުތު ހިނގަހިނގާ ހުރިކަން އަންގައިދޭ ބަސް. މިސާލު: އޭނާ ލިޔަނީއެވެ.
4	ފިޔަވަޅު 1، 2، 3،	އެއީ ބަސްބުނާހިނދު ހިނގަހިނގާ ހުންނަކަންތަކެވެ. މިސާލީ: އަލީ މިހާރު ލިޔަނީއެވެ.
5	ދިވެހިބަހުގެ ޤަވާއިދު 1، 2، 3،4	ވާހަކަދެކެވޭވަގުތު ހިނގަހިނގާ ހުންނަ ކަންތައް. މިސާލު: ސަލީމް ކަނީއެވެ.

 

ނ) ވާނޭކަން

#	ފޮތުގެ ނަން	ތަފްސީލް
1	ދިވެހިބަހުގެ ބަސްމަގު	ކުރިއަށް އޮތް ޒަމާނުގައި ނުވަތަ އަންނަން އޮތް ޒަމާނުގައި ކަމެއް ހިނގާނެކަމަށް ދޭހަވާ ބަސް. މިސާލު: ލިޔާނެ.
2	ސުއްލަމުލް ޢަރީބް	މިސާލު: އަހާނެ، ބުނާނެ.
3	ދަރިވަރުންގެ އެހީތެރިޔާ	ކޮންމެވެސް ކަމެއް އަންނާން އޮތް ޒަމާނުގައި ހިނގާނެކަން އަންގައިދޭ ބަސް. މިސާލު: މާދަމާ ހެނދުނު އޭނާ އަންނާނެ.
4	ފިޔަވަޅު 1، 2، 3،	އެއީ ބަސްބުނުމުގެ ފަހުން ވާނޭކަންތަކެވެ. މިސާލު: މާދަމާ ބައްތެލި އަންނާނެއެވެ.
5	ދިވެހިބަހުގެ ޤަވާއިދު 1، 2، 3،4	އަންނާން އޮތް ޒަމާނުގައި ހިނގާނެ ކޮންމެވެސް ކަމެއް ދޭހަކޮށްދޭ ބަސް. މިސާލު: ފަހަރެއްގައި މިރޭ ރިޒާ އައިސްދާނެ.

 

ރ) ނިމުނުކަން

#	ފޮތުގެ ނަން	ތަފްސީލް
1	ދިވެހިބަހުގެ ބަސްމަގު	ކައިރި ޒަމާނެއްގައި ހިނގާފައިވާކަން އަންގައިދޭ ކަމެއް. މިސާލު: އަތުވެއްޖެ.
2	ސުއްލަމުލް ޢަރީބް	މިސާލު: ބުނެފި، ހިފައިފި.
3	ދަރިވަރުންގެ އެހީތެރިޔާ	ކޮންމެވެސް ކަމެއް ވޭތުވެދިޔަ ޒަމާނެއްގައި ހިގައިފިކަން. މިސާލު: އޭނާ އެ ފޮތް ލިޔެފިއެވެ.
4	ފިޔަވަޅު 1، 2، 3،	އެއީ ބަސްބުނުމުގެ ކުރިން ހިނގާފައިވާ ކަންތަކެވެ. މިސާލީ: ދެންމެއަކު އޭނާ އަތުވެއްޖެއެވެ.
5	ދިވެހިބަހުގެ ޤަވާއިދު 1، 2، 3،4	ވޭތުވެދިޔަ ކައިރި ޒަމާނެއްގައި ހިނގާފައިވާ ކަމެއް. މިސާލު: އޭނާ ދެންމެ އަތުވެއްޖެ.

·       ހިނގާފައިވާ އެކަމެއްގެ ހާލަތު ބަދަލުނުވާ ކަންކަން.

·       ކަމެއްގެ ހަބަރެއް ދިނުމަށް ނުމުނުކަން ބޭނުންކުރެވޭ.

·       ނިމުނުކަމުން އުފެދޭ ނަންއިތުރު އާއްމުވާނެ.

·       އެހެންހުރިހާ ކަމަކުން އުފެދޭ ނަންއިތުރު ވަކިފަރާތަކަށް ހާއްޞަވާނެ.

 

ބ) ނިމިނިމުނުކަން

#	ފޮތުގެ ނަން	ތަފްސީލް
1	ދިވެހިބަހުގެ ބަސްމަގު	ދުރު ޒަމާނެއްގައި ހިނގާފައިވާކަން އަންގައިދޭ ކަމެއް. މިސާލު: އޭނާ ފާސްވިއެވެ.
2	ސުއްލަމުލް ޢަރީބް	މިސާލު: ބުނި، ކިޔެވި.
3	ދަރިވަރުންގެ އެހީތެރިޔާ	ކޮންމެވެސް ކަމެއް ވޭތުވެދިޔަ ޒަމާނެއްގައި ވެނިމިދިޔަކަން. މިސާލު: އޭނާ އައި އިރު އެ ކުއްޖާ މިހަކާ އިނދެފި.
4	ފިޔަވަޅު 1، 2، 3،	އެއީ ބަސްބުނުމުގެ މާކުރިން ވެނިމިފައިވާ ކަންތަކެވެ.  މިސާލީ: މިދިޔަ ފޯވަހީގައި ވަރަށް ރަނގަޅަށް މަސްވެރިކަން އައެވެ.
5	ދިވެހިބަހުގެ ޤަވާއިދު 1، 2، 3،4	ވޭތުވެދިޔަ ދުރު ޒަމާނެއްގައި ވެނިމިފައިވާ ކަމެއް. މިސާލު: މިދިޔަ އަހަރު ފަޒީލް ފާސްވިއެވެ.

 

ޅ) ނަމަވުން

#	ފޮތުގެ ނަން	ތަފްސީލް
1	ދަރިވަރުންގެ އެހީތެރިޔާ	ކަމެއް ހިނގީތީ ހިނގިކަމެއް ނުވަތަ ކަމެއް ހިނގައިފިނަމަ ހިނގާނޭކަމެކެވެ. މިސާލު: ހެދުނު ހޭލެވިއްޖެނަމަ ވަގުތަށްދާނަމެވެ.
2	ފިޔަވަޅު 1، 2، 3،	އެއި ކަމެއް ހިނގީތީ ހިނގިކަމެކެވެ. ނުވަތަ ކަމެއް ހިނގައިފިނަމަ ހިނގާނޭކަމެކެވެ. މިސާލީ: މަސައްކަތްކުރިނަމަ ކުރިއެރީސްކަން ގައިމެވެ.
3	ދިވެހިބަހުގެ ޤަވާއިދު 1، 2، 3،4	ކަމެއް ހިނގީތީ ހިނގިކަމެއް ނުވަތަ ކަމެއް ހިނގައިފިނަމަ ހިނގާނޭކަމެކެވެ. މިސާލު: ވިއްސާރަވީތީ ދަތުރު ލަސްވީއެވެ.

ކުރިޔަށް: ނަން