ނަމޫނާރަށަކަށް ކުރި ނަމޫނާ ދަތުރު

ލިޔުނީ: ހަބީބު ޒާހިރު

           މިދަތުރަކީ އަޅުގަނޑު ( ޖ. މަތީރަށު ތިންހިޔަ މުއްމަދުޒާހިދު ) ޒ. ތިރީރަށު އުފުލި ޖަމިއްޔާގެ ދަޢުވަތަކަށް، ފުޓްބޯޅަ މެޗެއް ކުޅުމަށް ތިރީރަށަށްކުރި ދަތުރެކެވެ. މި މެޗްގައި އެއްކޮޅުން  ބައްދަލުކުރާނީ އަޅުގަނޑު ރައީސް ކަމުގެ ދަށުގައިވާ ވިޔަރި ޖަމިއްޔާގެ ފުޓްބޯޅަޓީމެވެ. މިދަތުރުފުރީ 25 ޖެނުއަރީ 2005 ވަނަ ދުވަހުގެ ހެނދުނު 7.00 ގައެވެ. ފުޓްބޯޅަ ޓީމުގެ އިތުރަށް މިދަތުރުގައި 200 ވަރަކަށް މީހުން ބައިވެރިވިއެވެ. ރަށުގައި އޮތް އެންމެ ބޮޑު މަސްދޯނި ކަމަށްވާ 110 ފޫޓުގެ ގޮދާ ދޯނި އޮތީ ފުރިފައެވެ. އަދި ދޯނި އޮތީ ޖަމިއްޔާގެ ދިދައާއި ތަފާތު ކުލަކުލައިގެ ފޮތިންހަދާފައިވާ ދިދަތަކުން ޒީނަތްތެރިކޮށްފައެވެ. ދަތުރުގެ ދިގުމިނަކީ 45 މިނިޓެވެ.

           އާދަޔާޚިލާފަށް ކަނޑުމަޑު މޫސުންރީތި މިދުވަހު މިފަދަ ދަތުރެއްގެ މަތިންފެންނަން ހުންނާނެ ހުރިހާކަމެއް ފެނުނެވެ. ރަށުގެ އަންހެނުން މާކުރިން މިދަތުރަށް ތައްޔާރުވެފައިވާކަން ދޯންޏަށް އަރުވާފައިވާ ކާތަކެތިން ވެސް އެނގެއެވެ. ކެއުމުގެ މަޖަލާ އެއްވަރަށް ލަވަބާޒީއާއި ބޮޑުބެރުގެ ކުޅިވަރުވެސް އޮތެވެ. މެޗް އޮތީ ހަވީރުކަމަށްވާތީ ވަރުބަލިވެދާނެތީ މިކުޅިވަރުތަކުގައި ކުޅުންތެރިން ބައިވެރިނުވުމަށް އަޅުގަނޑު އެންގީމެވެ.

           ވީނުވީއެއް ނޭނގި ގޮދާދޯނިގޮސް ތިރީރަށުގެ ހިތްގައިމު ފަޅަށްވަދެ ފާލަމާ ކައިރިކުރިއިރު އެ ޖަމިއްޔާގެ އިސްމެމްބަރުންނާއި، ފުޓްބޯޅަ ކުޅުންތެރިންނާއި، ޢާއްމުރައްޔިތުން ދިދައާއި، ޕިންޕޮން ހިފައިގެން ޓީމަށް މަރުޙަބާ ކިޔަން ތިއްބެވެ. ޓީމުގެ ކޮންމެ ކުޅުންތެރިއަކަށް ވަރަށް ރީތި ގުލްދަސްތާއެއް ދެވުނެވެ. އަދިމަރުޙަބާގެ ޢިބާ ރާތްތައް ލިޔެފައިވާ ފޮތިތައް އަތިރިމަތިންނާއި، ރަށުތެރެއިން ފެނުނެވެ. އަތިރިމަތީގައި ހުރި ހިޔާދޭ ބޮޑެތި ގަސްތަކުގެ ދަށުގައި ތައްޔާރުކުރެވިފައިވާ ވެލްކަމްޑްރިންކަށް އިންސާފުކުރަމުން ދިޔައިރު ރަށުގެ ޒުވާން އަންހެންކުދިން މަރުހަބާގެ ރީތި ލަވައަކަށް، ހިތްގައިމު ޑާންސެއް ހުށަހަޅަމުން ދިޔައެވެ. އެހިސާބުން ދިޔައީ އަޅުގަނޑުމެން ޓީމުތިބެން ހަމަޖެހިފައިވާ ގެއަށެވެ. ފެންވަރައިނިމިގެން ހެނދުނުސައިބުމަށް ދިޔައީ އެ ޖަމިއްޔާގެ މައިމަރުކަޒަށެވެ. ސައިގެކަންތައް ނިމުމަށްފަހު ދެޖަމިއްޔާގެ މެމްބަރު އެއްބަޔަކު އަނެއްބަޔަކަށް ތަޢާރަފުކުރުން އޮތެވެ. އެއަށްފަހު ދިޔައީ ކުޑަކޮށް ރަށުތެރެ ބަލާލުމަށެވެ. ރަށަކީ ޢުމުރާނީގޮތުން ވަރަށްބޮޑަށް ތަރައްޤީވެފައިވާ، މަސްވެރި ރަށެއްކަން ރަށުތެރެއިންފެނުނު މަންޒަރު ތަކުން އެނގުނެވެ. ރަށުތެރޭގައި ހިނގަމުންދިޔައިރު އަޅުގަނޑަށް އެންމެ ފާހަގަކުރެވުނީ މިރަށުގައިވާ އާސާރީބޮޑު މިސްކިތެވެ. އެ މިސްކިތުގެ ބޭރުގައިވާ ލިޔުމުން އެނގުނު ގޮތުން މިހާރު އެމިސްކިތަށް 400 އަހަރު ވެދާނެއެވެ.

           ރަށުތެރޭގައި ހިނގާލުމަށްފަހު ގެއަށްދިޔައިރު މެންދުރުވެއްޖެއެވެ. ޓީމުގެ ކުޅުންތެރިންނާއެކު އެއް ޖާމާޢަތެއްގައި މެންދުރު ނަމާދުކުރުމަށް ފަހު ދެންދިޔައީ މެންދުރުކެއުމަށެވެ. ކައިނިމިގެން ވަރުބަލިފިލުވާލުމަށް ގޭގައި މަޑުކުރުމަށްފަހު މެޗުކުޅެން ދަނޑަށް ދިޔައިރު ދަނޑުއޮތީ ވަރަށް ފުރިހަމައަށް ތައްޔާރުކޮށްފައެވެ. މެޗްފެށުމަށް ރެފްރީ ފުމެލި ކަށިގަނޑުގެ އަޑާއެކު ތަރުޙީބުގެ އަޑުންމުޅި ތަންގުގުމައިގެން ދިޔައެވެ. މެޗް ނިމެންދެން މިއަޑަށް ބަދަލެއް ނައާދެއެވެ. ފޯރިގަދަ ރީތި މި މެޗް ނިމިގެން ދިޔައީ ދެޓީމުން ދެހާފުގައިޖެހި ދެލަނޑުން  އެއްވަރުވެގެންނެވެ. މެޗަށްފަހު ދެޓީމުގެ ދެމެދު ހަދިޔާ ބަދަލުކުރުންއޮތެވެ.                          

           އަޑުގަދަކުރާއިން، ރަށުންއައިމީހުން ފުރުމަށް އަތިރިމައްޗަށް ދިއުމަށް ގޮވާލުމުން އެންމެން ދިޔައީ އަތިރިމައްޗަށެވެ. އަތިރިމަތީގައި ހަވީރު ސައިވަނީ ތައްޔާރުކުރެވިފައެވެ. ދެންއަންނަ ބޮޑުޢީދެއްގައި ފުޓްބޯޅަ މެޗެއް ކުޅުމަށް ތިރީރަށަށް އައުމަށް ދަޢުވަތު ދިނުމަށްފަހު އަޅުގަނޑު ދޯންޏަށް އެރުމާއެކު ދޯނި ދުއްވާލިއެވެ. ދޯނިފަޅުން ނުކުންނަންދެން އަލްވަދާޢުގެ އަތްތައް ދެފަރާތުން ހޫރިހޫރި ހުއްޓެވެ.