ހަނދާނުން ނުފިލި ދަތުރު

ލިޔުނީ: ހަބީބު ޒާހިރު

            މި ދަތުރަކީ އަޅުގަނޑު ( ޕ. ފެހިފުށީ ފެތިރޯނު ހަސަން މުޙައްމަދު ) އަޅުގަނޑުގެ ގާތް ރައްޓެއްސެއް ކަމަށްވާ ޕ. ނޫފުށީ ފިނިހިޔާގޭ ޢަލީ ސަލީމުގެ އަންހެން ދަރިފުޅުގެ ކައިވެނިޕާޓީގައި ބައިވެރިވުމަށް އަޅުގަނޑުގެ ޢާއިލާއަށް ދެއްވާފައިވާ ދަޢުވަތަކަށް ޕ. ނޫފުއްޓަށް ކުރި ދަތުރެކެވެ. މިދަތުރުގައި ބައިވެރިވީ އަޅުގަނޑުގެ އަންހެނުން ފާތުމަތުޒަހީނާއާއި، އަޅުގަނޑުގެ 7 ކުދިންނާއި، 5 ކާފަ ކުދިންނާއި، އަވަށް ޓެރިންގެ 6 މީހުންނެވެ. މީގެއިތުރަށް މި ދަތުރުކުރި އަޅުގަނޑުގެ ކުރެނގި ދޯނީގެ 3 ފަޅުވެރިންވެސް ބައިވެރިވިއެވެ. މި ދަތުރުފުރީ 15 ޑިސެމްބަރ 2006 ވަނަދުވަހު ގެ 7.30 ގައެވެ.

           ދުވަހަކީ އިރުވައި މޫސުމުގެ ދުވަހެއްކަމުން އާދަޔާ ޚިލާފަށް ކަނޑުމަޑުވެފައި އިރު އުތުރުން ނަލަ ވައި ރޯޅިއެއް ޖެހެއެވެ. ދަތުރުފެށުމާއެކު އަންހެނުންނާއި، އަވަށްޓެރިންގެ ތެރެއިން ބައެއް މީހުން ދޯނިމަތީގައި ކެއުމަށް ތައްޔާރުކޮށްފައިވާ ކާތަކެތި ބަހަމުން ގެންދިޔައެވެ. ރޮއްޓާ މަސްހުންޏާ ކުޅިބޯކިބާއާއި، ފޮނިބޯކިބާއާއި، ކޮފީއާއި ކިރުސަޔަށް ދަތުރުގެ ހުރިހާ ބައިވެރިން އިންސާފު ކުރަމުން ދިޔައެވެ. ދަތުރަކީ 5 ގަނޑިއިރުގެ ދަތުރެއްކަމުން ކުދި ވެރިންނާއި، ދަތުރުގެ ބައިވެރިން ލަވަބާޒީ ކިޔުމާއި، ގޭމްކުޅުންފަދަ ކަންކަމުގައި ހަރާކަތްތެރިވަމުން ދެއެވެ. ހެނދުނުގެ ސަޔަށް އިންސާފު ކުރުމަށްފަހު ކުޑަ ރޭޑިޔޯއެއް ކަންފަތް ދޮށުގައި ބަހައްޓައިގެން ދޯނީގައި، ސަތަރިދަމައިގެން ހަދާފައިވާ ހިޔާގަނޑުގެ ތެރޭގައި އެއްފަރާތުގައި އަޅުގަނޑު އޮށޯވެލީމެވެ. އޭރުވެސް ކުދިވެރިން މަޖާކޮށް ސަކަރާތް ޖަހަމުން ގެންދިޔައެވެ.

           ކުއްލިއަކަށް އަޅުގަނޑަށް ހޭލެވުނީ އަޅުގަނޑުގެ ކާފަދަރިފުޅު މުބީނު '' މަހެއް ބޮޑުމަހެއް '' މިހެން ކިޔާ ހަޅޭލަވައި ގަތުމުންނެވެ. މިއަޑަށް ތެދުވެ ބެލިއިރު ވަދާނުކުމެ އުޅުނު ކުޑަ ދޯންޏެއްގެ ނަނުގައި ބޮޑު ހިބަރެއް ގަނެގެން އޭތި ފުންމަނީއެވެ. އޭރު އެ ހިބަރު ގަނެގެން އުޅޭ ދޯނި އަޅުގަނޑުމެން ދޯންޏާ ވަރަށް ކައިރިވެއްޖެއެވެ. ކުއްލިއަކަށް ހިބަރު ބުޅިން ނައްޓާލާފަ ފުންމައިގެން އައިސް ޖެހުނީ އަޅުގަނޑުމެން ދޯނީގެ ތައްޓުމަތީގައެވެ. އެންމެން އެއްފަހަރާ ހަޅޭއްލަވައިގަތެވެ. ހިބަރު އެރިދިމާ ކައިރީގައި ހުރި ދޯނީގެ ފަޅުވެރިއެއްގެ ގައިގައި ކޮންމެވެސް ވަރަކަށް ޖެހުންފިޔަވައި އެއްވެސް މީހަކަށް ގެއްލުމެއް ނުވެއެވެ. ދެން ދޯނިތެރެ ހީވީ ޢީދެއް އައިހެންނެވެ. ކުދިވެރިން ހިބަރު ފޮޓޯނަގާ އޭގައި އަތްހާކާ ހަދަން ފަށައިފިއެވެ. ބައެއް ކުދިން އޭގެ ކައިރީގައި ތިބެގެންވެސް ފޮޓޯނެގިއެވެ.

           މި މަޖަލުގައިތިއްބާ ވަގުތު ދިޔަ ގޮތެއްވެސް ނޭނގި ދޯނިގޮސް ނޫފުށީ ފަޅަށް ވެދެއްޖެއެވެ. ރީތިކޮށް ފުންކޮށް ހަދާފައިވާ މި ފަޅުތެރޭގައި ވަރަށް ގިނަ ތަފާތު އޮޑިފަހަރު ހުއްޓެވެ. އޭރު އަޅުގަނޑުގެ އެކުވެރި ޢަލީސަލީމާއި، އޭނާގެ އަންހެނުން އަޅުގަނޑުގެ އާއިލާގެ އިސްތިގުބާލުގައި ތިއްބެވެ. ރަށަށް ފައިބާ އެމީހުންނާއެކު އެގެއަށް ދާން ހިނގައިގަތްއިރުވެސް އެދަތުރުގެ މަޖާމުޅިން ފިލައިގެން ނުދެއެވެ.